Hér er aðeins minni lúxus. Eitthvað sem hentað gæti fleirrum. Ný hugmynd!

Hvað gerum við Íslendingar þegar það fara að koma 1.000.000 plús ferðamenn til landsins? Hvernig væri að nota íslenskt hugvit og þekkingu til að sérsmíða okkar eigið samgöngukerfi?

Síðustu vikur er ég búinn að velta fyrir mér og útfæra hugmynd sem gæti komið til með að leysa mörg vandamál okkar íslendinga í ferða- og samgöngumálum.

Samgöngukerfi á brautum gæti verið sniðug lausn fyrir þéttbýlasta svæðið sem er á suðvesturhorn landsins.

Hugmyndin gengur út á að byrja á því að tengja Suðurnesin við stórreykjavíkursvæðið með því að leggja sérsmíðaða braut frá Keflavíkurflugvelli til Reykjavíkur. Næsta skref er að tengja byggðirnar á Suðurlandinu ásamt vinsælustu ferðamannastöðunum saman í eitt kerfi.

Samgöngukerfið byggist á brautum ekki ósvipað lestum nema eftir brautunum aka vagnar og ýmis smáfarartæki. Faratækin myndu virka eins og verið væri að taka lyftu í fjölbýlishúsi. Þú stígur um borð og þrýstir á hnapp sem tilheyrir þeim stað sem þú ætlar að fara á. Þetta er í raun faratækis án ökumanns sem er eins og lyfta, nema lyftan er á hjólum.

Farartækið verður að vera létt og geta ferðast hratt yfir og ekki væri verra ef notast væri við innlenda umhverfisvæna orkugjafa.

Mikið er horft til Íslands þessa daganna í samgöngumálum. En hvað erum við annars að gera í þeim málum? Viljum við láta taka mark á okkur og sýna fram á það að við erum leiðandi þjóð á því sviði? Væri ekki ráð að koma með snilldar lausn sem allir myndu virkilega taka eftir?

Vissulega virkar þessi hugmynd stór í sniðum á marga við fyrstu sýn. Því ekki að nota íslenskt hugvit og þekkingu og samnýta sérþekkingu sem liggur víða í þjóðfélaginu til að hanna og smíða okkar eigið samgöngukerfi?

Við vitum að það er gríðarleg aukning í samgöngum á suðvesturhorni landsins með tilheyrandi vandamálum. Á sama tíma fjölgar ferðamönnum. Borgin er að springa undan umferðarþunga. Mikil gagnrýni er komin á Reykjavíkurflugvöll og það vantar tilfinnanlega byggingarsvæði fyrir Reykjavík.

Hvernig væri að koma með varanlega framtíðarlausn þar sem ekki er bara hugsað til morgundagsins?

Það voru margir svartsýnir þegar jarðgöngin undir Hvalfjörð voru byggð. Núna er jafnvel talað um að byggja önnur slík!

Fyrir nokkrum árum, þá stóðu stjórnvöld í Kuala Lumpa (Malaysia) í svipuðum vanda og voru að spá í að kaupa tilbúið kerfi frá Japan. Kerfið reyndist allt of dýrt svo að yfirvöld settust niður og óskuðu eftir því að innlendir aðilar kæmu með tillögu að nýju kerfi til að leysa samgöngumálin í borginni. Hönnuðir voru komnir með frumgerð (prototype) 3 mánuðum seinna og síðan hefur sú framkvæmd verið mikill happafengur fyrir borgina. En núna aka um borgina svo kallaðir "Monorail" vagnar á einu spori. Að auki eru þeir að flytja út þessa þekkingu til annarra landa í stórum stíl.

Á eftirfarandi mynd og korti má sjá hugmyndir af brautarkerfi fyrir suðvesturhorn landsins.

Brautarkerfi, lest eða monorail kerfi fyrir Reykjanes, Gullna hringinn og Suðurland (smellið á mynd til að sjá fleiri myndir)

Eins og sjá má á kortinu, þá er verið að tala um tvær megin leiðir. Sú rauða tengir byggðarkjarnana á Reykjanesi saman og sú seinni suðurlandið og áhugaverðustu ferðamannastaðina saman.

Það sem er sameiginlegt öllum þessum svæðum er að um þau fer mikill fjöldi fólks daglega og ætti það að styrka rekstur á slíku kerfi til muna.

Ef rauða leiðin um Reykjanesið er skoðuð nánar, þá má sjá að leiðin er óhefðbundin þar sem lögð er áhersla á fáfarna leið með stórbrotna náttúru í stað þess að fara hefðbundna leið þar sem þjóðvegurinn liggur. Um Reykjanesbrautina aka hátt í 10.000 bílar á sólahring sem getur verið um 10.000.000 farþegar á ári. Stór hluti af þessu fólki eru ferðamenn sem eru að koma til landsins eða fara frá landinu. Ekki er annað að sjá en að hlutfall ferðamanna eigi eftir að vaxa verulega á næstu árum. Því ætti flott aðkoma að landinu þar sem lögð er áhersla á stórbrotna náttúru að vera stórt atriði. Um Bláa Lónið fer stór hluti ferðamanna, einnig er að koma inn nýtt þorp á Keflavíkurflugvelli þar sem býr m.a. skólafólk sem þarf að hafa aðgang að ódýrum ferðamáta í skólana á Reykjavíkursvæðinu. Með tilkomu svona kerfis, þá stækkar í raun höfuðborgarsvæðið til muna. Einni eru háværar kröfur um að leggja niður Reykjavíkurflugvöll og flytja aðstöðuna til Keflavíkur og myndast þá verðmætt byggingarland í hjarta Reykjavíkur. Á ári ferðast um 400 þúsund farþegar með innanlandsflugi til og frá Reykjavíkurflugvelli. Til að byrja með myndu vagnarnir stoppa í öllum helstu byggðarkjörnunum og við Smáralind, Kringluna og miðbæ Reykjavíkur.

Ef litið er á Grænu leiðina, þá má sjá að hún er endurbættur, Gull hringur, sem er jafnframt vinsælasta leiðin sem við höfum upp á að bjóða ferðamönnum í dag. En á ári fara um 500.000 ferðamenn þessa leið og ef vöxtur eykst eins og miðað er við á næstu árum, þá verður ekki langt þar til að þeir verða um 1.000.000 á ári! Ferðaþjónustan er sú atvinnugrein sem vex hvað hraðast og er að afla um 12 prósent af gjaldeyristekjum þjóðarinnar.

Væri þá ekki ráð til að vernda svæði eins og Þingvöll betur að lágmarka alla umferð ökutækja um svæðið nema með svona hljóðlausum og umhverfisvænum vögnum. Ferðamenn tækju ferðavagninn til Þingvallar með því a velja viðkomandi hnapp og réðu svo sínum tíma sjálfir með því a ganga um svæðið og þegar viðkomandi telur sig búinn að fá nóg, þá er stigið upp í næsta vagn og haldið áfram á næsta áfangastað. Með þessu myndi fást mun meiri dreifing og álagstoppar lækka og ferðamaðurinn fær ekki á tilfinninguna lengur að það séu 20 rútur á sama tíma eins og oft vill gerast við Gullfoss og Geysi.

Samkvæmt könnunum, þá hafa erlendir gestir einkum áhuga á náttúrutengdri afþreyingu og býður Græna leiðin nánast upp á alla þá möguleika í einni hringferð.

Ástæðan fyrir því að græna leiðin er lögð upp að Langjökli er að við eigum að leggja stóraukna áherslu á að fólk fái að komast á jökla, á skíði, ísklifur, skíðagöngu, vélsleða jeppaferðir í snjó og allt við topp aðstæður. En eins og hefur áður komið fram hjá mér, þá á að leggja niður núverandi skíðasvæði og flytja þangað upp eftir.

http://photo.blog.is/blog/photo/entry/293926/
http://photo.blog.is/blog/photo/entry/263922/
http://photo.blog.is/blog/photo/entry/268551/
http://photo.blog.is/blog/photo/entry/267781/
http://photo.blog.is/blog/photo/entry/262950/

Nýjar byltingakenndar hugmyndir - Breytum vinsælustu ferðamannaleið landsins "The Golden Circle" í "The Golden Circle Delux"!

Leiðin milli jökla. Þórisjökull - Geitlandsjökull. Ný "The Golden Circle Delux" leið. Aðeins lenging um 30 km miða við núverandi leið.

Loftmynd af Þórisjökli og Geitlandsjökli (klikkið á mynd til að sjá fleiri myndir)

En eins og áður segir, þá gengur hugmyndin út á að láta vagninn aka eftir braut sem gæti verið svipuð og gömlu hitaveitustokkarnir. Svona stokkur gæti haft margþættan tilgang og þá sem lagnaleið á milli svæða fyrir raflagnir, fjarskiptalagnir, heitt og kalt vatn m.m.

Mynd sýnir stokk sem hefur fjölþættan tilgang auk þess að vera braut fyrir farartæki (klikkið á mynd til að sjá fleiri myndir)



Mynd sýnir rafdrifið ökumannslaust farartæki sem ekið gæti eftir svona brautum. (klikkið á mynd til að sjá fleiri myndir)

Nú skora ég á borgaryfirvöld, sveitastjórnir og stjórnvöld þessa lands að hugsa að alvöru um þessi mál.

Undirritaður býður sig fram til að safna saman hópi af hönnuðum, hugvitsmönnum og fyrirtækjum til að setjast niður og kortleggja möguleika í svona verkefni.

Kjartan
WWW.PHOTO.IS

Dýrasti lúxusbíllinn á 200 milljónir

HDR - Áhugaverð nýjung í ljósmyndatækni

Ný ljósmyndatækni

Hér koma nokkrar skemmtilegar ljósmyndir frá þessu ári sem að ég held mikið upp á. Það sem er sameiginlegt með þeim öllum er að þær eru teknar með svo kallaðri HDR tækni (High Dynamic Range images).

HDR tæknin gerir það mögulegt að ná myndum sem hafa mun meira lýsingarsvið en hægt er að ná með hefðbundinni ljósmyndatækni.

En tæknin byggist á því að teknar eru margar myndir sem síðan eru settar saman hver ofan í aðra og fást þá myndir eins og sjá má hér á eftir:

Hér er mynd sem er gríðarlega erfitt að ná þar sem myndin er tekin beint á móti sól. En eins og sjá má, þá næst himininn og sú hlið á bílnum sem er í skugga að lýsast þannig að hægt er að greina öll smáatriði bílsins.

Ford jeppi með sólina í bakgrunni. Dæmi um erfiða ljósmynd sem HDR tæknin gerir mögulega að taka.

HDR ljósmynd af bíl (smellið á mynd til að sjá fleiri myndir)

Næsta mynd sýnir mynd af Svartafossi sem tekin er með HDR tækninni á miðjum degi og einnig með glerjum (ND filter) sem lengja lýsingartímann

HDR ljósmynd af Svartafossi í Skaftafelli (smellið á mynd til að sjá fleiri myndir)

Á næstu tveimur myndum má sjá mismun á mynd sem tekin er á hefðbundin máta og svo mynd sem tekin er með HDR tækninni.

HDR ljósmynd af Sönghellinum í Reynisfjöru (smellið á mynd til að sjá fleiri myndir)

Og svo sama mynd tekin á hefðbundin máta. En eins og sjá má, þá ræður myndavélin illa við að lýsa upp skuggasvæðin.

Venjuleg ljósmynd af Sönghellinum í Reynisfjöru (smellið á mynd til að sjá fleiri myndir)

Hér má svo sjá samanburðinn á öðrum tveimur myndum sem teknar eru inni í Reykjadal fyrir ofan Hveragerði af hverasvæðinu.

HDR ljósmynd af hverasvæðinu í Reykjadal fyrir ofan Hveragerði (smellið á mynd til að sjá fleiri myndir)

Og svo sama mynd tekin á hefðbundin máta. En eins og sjá má, þá ræður myndavélin illa við að lýsa upp skuggasvæðin án þess að brenna út himininn um leið.

Venjuleg ljósmynd af hverasvæðinu í Reykjadal fyrir ofan Hveragerði (smellið á mynd til að sjá fleiri myndir)

Og svo að lokum enn eitt dæmi um svona myndatöku.

HDR ljósmynd af hverasvæðinu í Reykjadal fyrir ofan Hveragerði (smellið á mynd til að sjá fleiri myndir)

Og svo sama mynd tekin á hefðbundin máta. En eins og sjá má, þá ræður myndavélin illa við að lýsa upp skuggasvæðin án þess að brenna út himininn um leið.

Venjuleg ljósmynd af hverasvæðinu í Reykjadal fyrir ofan Hveragerði (smellið á mynd til að sjá fleiri myndir)

Svo að lokum, þá er það ykkar að dæma hvort kemur betur út. En svona myndataka og vinnsla er mjög tímafrek en þegar vel tekst til, þá geta komið mjög flottar myndir út úr svona myndatöku.

Kjartan
WWW.PHOTO.IS

Hvar er Valahnúkur í Þórsmörk? Myndir og kort.

Hér er vaskur hópur eldri borgara frá Danmörku að ganga á Valahnúk í Þórsmörk. Á köplum getur leiðin verið brött en lagður hefur verið góður stígur sem liggur upp á toppinn og svo þaðan niður í Húsadal.

Gengið upp stíg sem liggur upp á Valahnúk í Þórsmörk (smellið á mynd til að sjá fleiri myndir)

Hér er vaskur hópur eldri borgara frá Danmörku komin á topp Valahnúks í Þórsmörk. Veðrið var magnað á staðnum þar sem sól og rigning var á víxl og myndaðist þessi fallegi regnbogi á meðan á göngunni stóð.

Hópmynd á Valahnúki með regnboga (smellið á mynd til að sjá fleiri myndir)

Stórkostlegt útsýni er af hnjúknum og er þar útsýnisskífa með örnefnum af fjallahringnum á svæðinu. Ýmis félagasamtök hafa verið dugleg við að koma upp svona skífum viða um land.

Útsýnisskífa á Valahnjúki (smellið á mynd til að sjá fleiri myndir)

Flott laug er í Húsadal og er gott að baða sig þar eftir gönguna á hnjúkinn

Laugin í Húsadal í Þórsmörk (smellið á mynd til að sjá fleiri myndir)

Frægur hellir sem kenndur er við útilegumanninn Snorra er við gönguleiðina milli Húsadals og Langadals. Vinsælt er að reyna að komast upp í hellinn sem getur verið erfitt þó svo að höggvin hafa verið spor í móbergið til að auðvelda uppgönguna.

Hellirinn Snorraríki í Þórsmörk í Húsadal (smellið á mynd til að sjá fleiri myndir)

Útilegumaðurinn Snorri er sagður hafa flúið í hellinn Snorraríki þegar hann var á flótta undan heimamönnum sem hugðust taka hann fastan fyrir að stela sauðfé af bændum í sveitinni. Héraðsmenn náðu honum ekki því Snorri varnaði þeim uppgöngu í hellinn. Hugðu þeir þá svelta hann inni. Þegar hann átti aðeins eitt læri óétið eftir, þá kastaði hann því út. Töldu menn þá einsýnt að hann ætti nógan mat og hurfu frá.

Á árunum 1802 til 1803 var búið í Húsadal í Þórsmörk og voru lífskjör erfið.

Skógur á svæðinu var nýttur fram til 1950 og var fé haft á svæðinu fram á vetur. Gæslumenn sem pössuðu féð bjuggu í hellum.

Yfirlitskort af Þórsmörk

Kort af svæði við Mýrdalsjökul (smellið á mynd til að sjá fleiri myndir)

Og svo ein flott mynd í lokin af einum jeppa af gömlu kynslóðinni. En fyrsti bíll sem kom inn í mörkina var árið 1934.

Hér er ekið yfir Krossá á leið inn í Húsadal og eins og sjá má þá er mikið í ánni

Farið á vaði yfir Krossá á leið inn í Húsadal (smellið á mynd til að sjá fleiri myndir)



Hér eru svo tengingar á myndir sem teknar hafa verið í Mörkinni við ýmis tækifæri

http://www.photo.is/06/09/2/index_3.html
http://www.photo.is/06/08/4/index_9.html
http://www.photo.is/06/08/3/index_22.html
http://www.photo.is/06/07/6/
http://www.photo.is/06/04/1/index_2.html
http://www.photo.is/06/07/1/index_7.html


Kjartan
WWW.PHOTO.IS

Þyrla Landhelgisgæslunnar sækir göngumann til Þórsmerkur

Konur eru konum verstar

Auðvitað eru konur sjálfum sér og öðrum konum versta. Ég verð að viðurkenna að ég er pínu hrifin af Margréti og hennar baráttu.

Mun seint gleyma orðum hennar þegar hún var að bera sín störf fyrir Frjálslynda flokkinn saman við störf framkvæmdastjóra flokks sjálfstæðismanna sem á þeim tíma var Kjartan Gunnarsson.

En fyrir sinn flokk gengi hún í öll störf og hún sæi tæpast Kjartan Gunnarsson standa í klósetþrifum fyrir sinn flokk :)

Vantrausti lýst á Margréti Sverrisdóttur

Spurning um að fara að blogga aftur?

Ég tók mér smá blogg hlé í 2-3 mánuði. Mig er farið að kitla í puttanna aftur, enda af nógu af taka til að blogga um.

Ég á mér mörg áhugamál og spurning hvort að það sem að ég er að vinna í þessa dagana getur orðið eitthvað stórt - hver veit. Ef svo verður, þá mun ég hafa lítið annað að gera næstu árin en að sinna því sem var upphaflega aðeins áhugamál.

Kem með nánari upplýsingar á næstu dögum.

Kjartan

p.s. þetta heitir að byggja upp spennu :)

Áhugamálið orðið að aðalstarfinu

Frábært - Nú er umboðsmaður að vinna þá vinnu sem honum er ætlað.

Glæsilegt að umboðsmaður Alþingis skuli ætla sér að taka "aðeins" til hendinni í þeirri ormagryfju sem íslensk stjórnsýsla er orðin. Fram að þessu hafa fáir þorað að líta inn fyrir þær dyr og þeir sem það hafa gert hafa verið fljótir að loka þeim aftur.

Hvers vegna?

Umboðsmaður Alþingis óskar upplýsinga um REI

Það eru draugar víða á Íslandi!

Ég varð fyrir þeirri stórkostlegu upplifun að komast á stað sem að mig er lengi búið að langa til að komast á. En staðurinn er einn sá aldraugalegasti sem að ég hef komið á í langan tíma.

Staðurinn er eyðibýli sem heitir Ljótsstaðir og er einn af efstu bæjum í Laxárdal fyrir norðan ekki langt frá Mývatni. Að bænum er seinfarin 4x4 jeppaslóði og er kjörið fyrir þá sem þora að fara og líta á staðinn.

Hér má sjá kort af Laxárdal þar sem sjá má illfæran 4x4 jeppaslóða sem liggur heim að bænum.

Ljótsstaðir í Laxárdal. Smellið á kort til að sjá fleiri myndir. Myndir sem teknar voru úr lofti á ferð um svæðið

Því miður hef ég ekki náð að kynna mér sögu þessa merkilega eyðibýlis nægjanlega.

En eftir því sem mér skilst, þá bjó þarna fjölskylda fram undir 1950 sem fór frá staðnum mjög skyndilega og skildi nánast allt eftir í því ástandi sem það nú er.

Þarna er komið að lokuðum dyrum þar sem útidyralykilinn er enn í skránni. Á miða í hurðinni má lesa eftirfarandi skilaboð:

“Verið svo væn að stappa af fótunum

Áður en þið gangið inn

Hér er ekki stungið út nema einu sinni á ári”

Miði á hurð (smellið á mynd til að sjá fleiri myndir)

Þegar inn er komið, þá blasa við innanstokksmunir, fatnaður, dagblöð og fleira nákvæmlega eins og hlutirnir voru í kringum 1950.

Það vakti strax athygli okkar gömul dagblöð sem lágu á eldhúsborðinu. Þar mátti sjá Þjóðviljann dagsettan 30 júní 1953

Þjóðviljinn frá 1953 (smellið á mynd til að sjá fleiri myndir)

Þar var umfjöllun um kosningarúrslit þar sem lesa mátti eftirfarandi tölur:

Sálfstæðisflokkur 37.21% (28.779)
Framsóknaflokkur 21.86% (16.912)
Sósíalistaflokkur 16.03% (12.396)
Alþýðuflokkur 15.66% (1.109)
Þóðvarnarflokkur 5.98% (4.628)
Lýðveldisflokkur 3.26% (2.525)


En fyrirsögn blaðsins var: “Herbragðið tókst: Andstaðan gegn hernáminu sundraðist, þótt hernámsflokkarnir töpuðu fylgi”

Eldhúsið var hrörlegt að sjá og það var ekki laust við að manni væri viðbrugðið þegar hverjar dyrnar á hverri vistarverunni á fætur annarri voru opnaðar. Þarna mátti sjá fullbúið hjónaherbergi, og barnaherbergi með öllum leikföngum, fatnaði og bókum eins og hafði verið skilið við fyrir um 50 árum síðan.

Eldhúsið (smellið á mynd til að sjá fleiri myndir)



Barnaherbergið (smellið á mynd til að sjá fleiri myndir)

Í húsinu eru um 15 herbergi. Þar má nefna, ýmsar geymslur, bílskúr, búr, saumaherbergi, rafstöð, vinnuherbergi með hefilbekk og öðrum verkfærum

Það var ekki fyrr en heim var komið og farið var að skoða myndir sem teknar voru í húsinu að það kom í ljós að ýmsir draugar voru á myndunum eins og sjá má ef vel er skoðað á þessari mynd:

Draugur í stólnum (smellið á mynd til að sjá fleiri myndir)

Ég var með þá hugmynd að gista í húsinu um nóttina en það var ekki laust við að það setti að manni ónotatilfinning við að fara um þessar vistaverur í rökkri, þokan var að leggjast yfir og vinkona mín sem var með mér í þessari för var orðin svo hrædd að það var ákveðið að flýta sér að skrifa í gestabókina og láta sig hverfa áður en það færi að rökkva meira.

Þessi staður er líklega einn af topp tíu stöðum sem að ég hef komið á á ferðum mínum um landið. Alveg kjörin fyrir gönguhópa sem “þora” ... en það má þá alltaf gista tjöldum.

Kjartan
WWW.PHOTO.IS

Afmælisferð í draugahús