Nýtt nákvæmt kort að jarðskjálftum við Upptyppinga!

Það er magnað að fylgjast með kvikuhreyfingum við Upptyppinga. Hér útbjó ég nýtt og nákvæmt kort út frá nýjustu gögnum Veðurstofunnar.

Svo er að sjá að óróinn á svæðinu færist stöðugt í aukana og ef tölugildin á vef Veðurstofunnar eru skoðuð nánar, þá má sjá að það grynnkar stöðugt á óróanum við Álftarnesdyngju.

Ég útbjó kort sem er í meiri gæðum en það sem Veðurstofan er að bjóða upp á á sínum vef og lagði þeirra gögn yfir kortið og fékk ég þá þetta kort hér:

Kort af svæði þar sem virknin er mest í kringum Upptyppinga (smellið á mynd til að sjá fleiri myndir)

Þarna má sjá svæðið frá Kárahnjúkum að Öskju. Einnig er ég búinn að útbúa hæðargraf eða þversnið af svæðinu þar sem rauða línan er teiknuð inn á kortið. Það graf má sjá í athugasemdum sem koma með þessari færslu.

Samkvæmt kortinu, þá virðist mesta virknin vera aðeins til hliðar austan megin við Upptyppinga.

Ef farið er inn á vef Veðurstofunnar og skoðuð jarðskjálftavirkni á svæðinu, þá má sjá virknina á Vatnajökli eins og hún er núna

Jarðskjálftakort Veðurstofunnar af Vatnajökli (smellið á mynd til að sjá fleiri myndir)



Kjartan
WWW.PHOTO.IS

Ekkert lát á jarðskjálftum

Athugasemdir

[Haukur (IP-tala skráð) 10.12.2007 kl. 20:40]

Ekki er þetta sambærileg skölun og á korinu veðurstofunnar. Það sést t.d. á því að á Kortinu Kjartans eru upptök komin langleiðina að Hálslóni, á meðan sömu deplar eru langt í burtu á veðurstofukortinu.

[Kjartan Pétur Sigurðsson, 10.12.2007 kl. 21:32]

Þetta er eins nákvæmt og það getur verið miða við þessi kort. Kortið frá Veðurstofunni er að vísu lítið en þegar ég stækka það ofan í kortið sem að ég nota, þá falla vegir, ár og önnur smáatriði nákvæmlega saman svo að það er ekkert plat þarna í gangi nema hvað punktarnir eru heldur stærri á þessu korti. Að auki þarf ég að snúa aðeins kortinu og þá falla myndirnar 100% saman.

Það má vera að mörgum þyki þessi skjálftavirkni óþægilega nálægt Hálslóni sem er um 15 - 20 Km fjarlægð. En þó svo að það yrði eldgos á þessum stað þá eru margir þröskuldar á milli eins og sjá má á þessu hæðargrafi sem að ég teiknaði.

Svo myndi hraunið líklega að mestu renna til norðurs ef af gosi yrði.

Sæll Einar. Það er gaman að spá í jarðfræðina þegar Ísland er annars vegar. Enda er landið algjör gullnáma hvað það varðar. Ef af gosi yrði, þá skulum við vona að það verðir bara smá túristagos og þá svona aðeins til að létta á þeim þrýstingi sem hið nýja lón veldur :)

[Emil Hannes Valgeirsson, 10.12.2007 kl. 22:48]

Eigum við ekki frekar að vonast eftir almennilegu gosi sem stendur lengi, framleiðir mikið af hrauni og umfram allt með sem mestu sjónarspili. Gott og almennilegt gos í óbyggðum er það sem þjóðin vill svo framarlega að ekki hljótist af mannskaðar eða stórkostlegt eignartjón. Ég þykist allavega greina eftirvæntingu hjá mörgum og er ekki alveg laus við hana sjálfur en er mest hræddur um að ekkert verði úr þessu.

[Hjörleifur Sveinbjörnsson (IP-tala skráð) 10.12.2007 kl. 23:13]

 Það er hægt að sjá skjálftana líka í google earth, en þessi síða er bara enn tengd "gamla" vefnum hjá VÍ.

Upptyppingaskráin á síðunni inniheldur eingöngu yfirvarna skjálfta en "Síðustu 2 dagar" eru úr sjálfvirkri úrvinnslu.

 slóðin er http://hraun.vedur.is/ja/google

 
Til að skoða skjálftana þá er notaður tímasleðinn efst í Google Earth forritinu og er hægt að stylla hraðann með því að smella á klukkuna til vinstri við hann og er best að stylla það á hægast (slow).  Einnig er hægt að breyta tímaglugganum sjálfum, þ.e. hversu stórt tímabil er skannað hverju sinni, en þetta er bara eitthvað sem maður verður að prófa sig áfram með í forritinu.

 kveðja

Hjörleifur 

[Hjörleifur Sveinbjörnsson (IP-tala skráð) 10.12.2007 kl. 23:19]

Það er einnig mjög einfalt að skella svona kortum inn í google earth sem "map overlay" og stylla það bara af og vista það svo sem kml eða kmz skrá og skella henni á vefinn til niðurhals.

 Kveðja

Hjörleifur 

[Kjartan Pétur Sigurðsson, 10.12.2007 kl. 23:48]

Sæll Emil. Það er líklega ekki á mörgum stöðum í heiminum sem að fólk flykkist á staðinn til að verða vitni af upphafi á gosi eins og við íslendingar gerðu síðast þegar Hekla gaus.

Því miður gleymdu sumir að líta á veðurspánna í öllum látunum og spenningnum sem varð í kringum gosið. En um kvöldið lentu hjálparsveitir á suð-vestur horni landsins í annarri stærstu björgunaraðgerð landsins við að bjarga forvitnum íslendingum sem voru á heimleið og sátu fastir í bílunum sínum á Hellisheiði og í Þrengslunum.

Ekkert að þakka Erling, en varðandi brot á mannréttindum, þá er það eitthvað sem stjórnvöld eru fljót að stinga hausnum í sandinn yfir - því miður. Oft til að fá málum hér á Íslandi þokað eitthvað áfram, þá virðist þurfa stóra og öfluga þrýstihópa til að vekja athygli, oft á málefnum sem ættu að teljast sjálfsögð mannréttindi.

En Hjörleifur, ég leit á þetta Google dæmi. Og er greinilegt að þarna er enn ein flott notkun í gangi hvernig hægt er að nýta sér þessa snilldartækni sem Google Eart hefur gefið okkur. Þessa daganna er ég að skoða annað flott dæmi þar sem hægt er að nota Google Eart til að ferðast um landið í 3D eftir GPS hnitum ... og það bara virkar :)

[Ása Hildur Guðjónsdóttir, 10.12.2007 kl. 23:53]

Takk fyrir góð og skemmtileg kort. Ég hef mjög gaman af að spá í þetta þó lítið hafi ég vit á þessu. Takk

[Kjartan Pétur Sigurðsson, 11.12.2007 kl. 00:03]

Það er nú í góðu lagi að vera leikmaður í þessu eins og öðru. Ný tækni hefur opnað dyr af mörgu flóknu eins og jarðfræðinni í þessu tilfelli. Nú getur hver sem er farið inn á netið og spáð í nánast allt milli himins og jarðar. Veðurstofan á hrós skilið fyrir frábæra heimasíðu og er óhætt að segja að það er af sem áður var :)

[Jón Magnús, 11.12.2007 kl. 00:23]

Ég segi það sama, frábært að fylgjast með þessu á vefnum hjá þeim.  Þetta er eins og besta spennumynd (svona fyrir áhugamann um jarðfræði eins og mig )

Annars verð ég að hrósa þér fyrir þessar upplýsingar, hef afskaplega gaman að sjá einhvern vera að greina svona upplýsingar.  Ég sakna að sjá ekki jarðfræðinga meira activa á blogg-svæðum, þeir gætu kannski komið með ennþá meiri fróðleik (sérstaklega ef þeir innu á veðurstofunni ).

T.d. væri gaman að sjá hvert hraunið myndi renna ef það kæmi upp þar sem mestu skjálfarnir eru og hvar það þyrfti að koma upp svo að Kárahnúkar væru í hættu

[Kjartan Pétur Sigurðsson, 11.12.2007 kl. 00:54]

Tek undir það að fyrir áhugamenn um jarðfræði, þá eru margir spennandi hlutir að gerast hér á Íslandi þessa dagana. Mér finnst vanta meira af sérfræðingum um jarðfræði hér inn á bloggið og þannig mætti það vera um mörg fleiri mál. Að vísu er til fyrirbæri eins og Vísindavefurinn en hann er frekar svifaseinn og þú lendir jafnvel í því að senda inn fyrirspurnir þangað sem ekki er svarað.

Hraði bloggsins er gríðarlegur og ef menn ætla að fylgja honum eftir, þá þarf að standa á tánum. Það er lítið spennandi að fara nýr inn á bloggið og reyna að ná einhverri athygli og svo er það lítið gaman að vera að blogga um eitthvað sem engin les.

Spurning hvort að bloggið kalli ekki á nýja tegund af ríkisstarfsmönnum eða þá að ríkið myndi hafa nokkra sérfræðinga hreinlega á launum til að fræða okkur hin um hin ýmsu málefni. Þetta yrði þá eins konar blogg-skóli. Sem dæmi, þá hefur Einar veðurfræðingur staðið sig mjög vel og verið fræðandi um það sem hann hefur fjallað um, enda hæg heimatökin. En því miður, þá búa ekki allir svo vel :)

Því er það hlutverk þeirra sem stjórna svona netmiðli að vera vakandi og reyna að standa sig í því að benda á það efni sem er áhugavert hverju sinni.

[Guðjón Sigþór Jensson, 11.12.2007 kl. 08:44]

Sem áhugamaður um jarðfræði og hálendið þá er kortið þitt Kjartan kærkomin viðbót. Fróðlegt verður að fylgjast með áframhaldandi þróun, hvort jarðskjálftahrinur haldi áfram og einnig því hvort á þessu svæði séu einhverjar umtalsverðar hreyfingar á jarðskorpunni á þessum slóðum og jarðlögunum þar í kring.

Eðlilegt er að tengja öll þessi miklu þyngsli sem fylgja vatnsfyllingunni í þessu umdeilda uppistöðulóni sem ekki þyrfti endilega að vera. Vatnssúla sem er 200 metrar á hæð er ekki þyngri í raunveruleikanum en um 80 metra hár ás í landslagi þegar eðlisþyngd jarðefna er nálægt því að vera um 2.5. Og nóg er af hæðunum, ásunum og fjöllunum norðan við Vatnajökul sem eins gætu haft áhrif ekki síður en þessi stóri drullupollur, Hálslón.

En það verður ábyggilega margt spennandi sem á eftir að koma síðar í ljós, kannski eldgos og það e.t.v. af þeirri gerð sem við höfum ekki séð áður á Íslandi, nefnilega dyngjugos eins og Páll Einarsson jarðeðlisfræðingur taldi ekki vera útilokað á þessum slóðum.

Bestu þakkir!

Mosi

[Hjörleifur Sveinbjörnsson (IP-tala skráð) 11.12.2007 kl. 10:00]

Á vefnum http://karahnjukar.is er mynd af svæðinu og prófaði ég að skella þeirri mynd inn í Google Earth og setti hana svona inn eftir bestu getu, en það er jú einhver vörpun á myndinni sem passar því ekki alveg við hnitin í Google Earth, en þetta er nokkuð nálægt.

 Hægt er að sækja skránna hér  http://hraun.vedur.is/ja/google/kmls/karahnjukasvaedid.kmz

Kveðja Hjörleifur

[Lára Hanna Einarsdóttir, 11.12.2007 kl. 10:10]

Enn og aftur má ég til með að hrósa þér fyrir kort og myndir. Var að kíkja á skjálftavakt veðurstofunnar, þar er allt að gerast eins og sagt er. Þetta er spennandi. Tek undir það sem hér hefur komið fram og lýsi eftir jarðfræðingum og/eða öðrum vísindamönnum sem lagt geta orð í belg og skýrt hlutina nánar - hér eða annars staðar.

[Maggi (IP-tala skráð) 11.12.2007 kl. 11:33]

Þetta er með flottari vinnu sem ég hef séð hér á moggablogginu. Um að gera að halda áfram á sömu braut.