Það gleymist að Íslendingar bjuggu lengi vel við svipaðar aðstæður

Ég hef átt þess kost á að komast til Grænlands í nokkur skipti. Árið 2005 fórum við nokkrir leiðsögumenn í ferð til Grænlands til að kynna okkur aðstæður.

Hópurinn lendir á flugvellinum í Kulusuk og þurfti að byrja á því að ganga frá flugvellinum niður í bæ sem tók um 40 mín. Á leiðinni bar margt undarlegt fyrir sjónir.

Eitt að því fyrsta sem varð á vegi okkar var þessi litskrúðugi kirkjugarður og við nánari skoðun, þá kom í ljós að allar plönturnar á leiðunum voru úr plasti.

Kirkjugarður í Kulusuk (smellið á mynd til að sjá fleiri myndir)

En annars er jarðvegur svo lítill í Grænlandi að á mörgum stöðum eru hinir látnu dysjaðir ofanjarðar og grjót hlaðið yfir og má sjá það víða fyrir utan heimilin hjá þeim.

Hópurinn fékk að gista í þessu gamla húsi í þorpinu Kulusuk og þaðan var svo farið í margar skemmtilegar gönguferðir næstu daga.

Lúxus hótel í Kulusuk (smellið á mynd til að sjá fleiri myndir)

Þarna fékk hópurinn að kynnast af eigin raun, næstu daganna, frumstæðum aðstæðum sem þetta fólk býr við. Ekki laust við að sumir yrðu fyrir smá áfalli. Á 5 stjörnu hótelinu var sofið á gólfinu, hitað upp með olíuofni, ná þurfti í allt vatni í fötur í þar til gerða vatnspósta, klósettið var fata og engin sturta í húsinu. Hægt var að komast í sameiginlega sturtu og þvottaaðstöðu á öðrum stað í bænum.

Fljótlega eftir að komið var inn í bæinn, þá tók stór hópur af börnum á móti ferðamönnum

Stór barnahópur að leik tekur á móti ferðamönnum (smellið á mynd til að sjá fleiri myndir)

Þrátt fyrir erfiðar aðstæður þessara barna, þá virtust þau njóta lífsins í þessu náttúrulega umhverfi.

Víða mátti sjá hrörlegar aðstæður sem þetta fólk býr við

Húsakostur í Kulusuk (smellið á mynd til að sjá fleiri myndir)

Kulusuk er á eyju og hefur þorpið byggst upp ekki langt frá flugvellinum. Þar búa nú rétt rúmlega 300 manns.

Hundar hafa lengi vel verið fleiri en íbúar þorpsins! En þegar mest var, þá voru þeir um 800 talsins og fer þeim óðum fækkandi með nýjum tímum.

Hundar í Kulusuk (smellið á mynd til að sjá fleiri myndir)

Meðhjálparinn var búinn að taka að sér messuhaldið á staðnum. Presturinn farinn og organistinn komin á aldur og engir til að taka við þessum mikilvægu embættum. Tónlistakennslan í lamasessi og sjá má hvernig þorpsbúum fækkar smátt og smátt og húsum fjölgar sem leggjast í eyði. Unga fólkið flytur til stóru byggðakjarnanna eða til Danmerkur. Bilið á milli kynslóðanna er gríðalegt!

Meðhjálparinn messar yfir örfáum gestum (smellið á mynd til að sjá fleiri myndir)

Ef gengið er um þorpið, þá má sjá að hluti þorpsins er þegar komin í eyði

Mörg húsanna eru í niðurníðslu eins og sjá má (smellið á mynd til að sjá fleiri myndir)

Haukur Hauksson kallar nú ekki allt ömmu sína. Enda búinn að búa í Rússlandi í rúm 10 ár :)

Hér er Haukur nývaknaður og til í slaginn. En morgunmaturinn var upphituð loðna frá deginum áður sem þykri herramanns matur bæði á Grænlandi og Rússlandi (smellið á mynd til að sjá fleiri myndir)

Fyrr um daginn var flogið með þyrlu frá Kulusuk til Amaksalik og seinna sama dag var siglt til baka á 2 bátum. Þoka skall á og var það þrautin þyngri að finna leið til baka í gegnum ísspöngina. Bátarnir að verða bensínlausi og hópurinn orðin villtur. Það vildi okkur til happs að einhver var með GPS og hafði sett inn punktinn á Kulusuk deginum áður.

Einn af mörgum borgarísjökum á leiðinni (smellið á mynd til að sjá fleiri myndir)

Þorpsbúar lögðu mikið á sig til að gera för hópsins sem skemmtilegasta. Hér er verið að sýna hvernig veiðiaðferðir voru fyrr á tímum.

Skutli slöngvað í átt að bráðinni (smellið á mynd til að sjá fleiri myndir)

Þar sem konur eru á ferð, þar er Steinar mættur

Hér er Steinar í fangabrögðum við konuna sem var að dansa ástardansinn fyrir hann (smellið á mynd til að sjá fleiri myndir)

Kyrrðin og þögnin var æpandi

Hér lagðist hópurinn niður og slappaði af eftir langa göngu - ógleymanleg stund (smellið á mynd til að sjá fleiri myndir)

Hér er siglt með hópinn á afskektan stað og skilin eftir. Hér fóru Kjartan og Steinar í ævintýralega fjallgöngu og mátti þakka fyrir að ekki fór illa.

Báturinn kvaddur (smellið á mynd til að sjá fleiri myndir)

Tíkin á staðnum var að eiga hvolpa. Eigandinn var mest hræddur um að þeir yrðu of margir og þá of marga munna að metta. Því er ekki óalgengt að einhverjum sé lógað til að spara matinn.

Tíkin kann að pósa og brosa fallega framan í myndavélina (smellið á mynd til að sjá fleiri myndir)

Hér stendur hópurinn á einum ísnum í fallegum firði norðan við Kulusuk.

Ísjaki í fjörunni (smellið á mynd til að sjá fleiri myndir)

Ógleymanleg ferð ...

Kjartan
WWW.PHOTO.IS

Skelfilegar félagslegar aðstæður á Grænlandi

Athugasemdir

[Árni Valur (IP-tala skráð) 2.11.2007 kl. 09:34]

Þú mátt ekki gleyma því að það er hotel í Kulusuk sem býður upp á góða þjónustu, flott herbergi með sér baði, rennandi vatni og veitingastað!  Þú málar ferkar svarta mynd af staðnum.. Auðvitað er margt þarna sem betur má fara, en það er líka allt í lagi að minnast á jákvæðu hlutina sem eru  þarna !!  Sem leðsögunmaður ættir þú að vita að Kulusuk ekki skrifað kúlusukk og Ammassalik ekki skrifað Amaksalik.. 

[Guðmundur Þorsteinsson (IP-tala skráð) 2.11.2007 kl. 09:36]

Kæri Kjartan

Ég hrýfst af myndum þínum og kannast mjög vel við umhverfið í Kulusuk. Og hér eru staðreyndir í lit. Og það sem gleður mig mest eru brosin á börnunum. Þetta þekki ég vel og sé daglega hér í Nuuk þar sem ég bý. Náttúran og umhverfið á Austur Grænlandi er stórbrotin og ægifögur. Ég hef oft komið til Kulusuk Meira af þessu. Getu verið að ég sendi þér par myndir frá t.d. suður Grænlandi til að á upp í þér ljósmyndarann.

Yfirskriftin á fréttinni um félagslegar aðstæður á á Grænlandi á fullan rétt á sér. Þær eru skelfilegar. En þáttur sá er sýndur var í danska sjónvarpinu var að mínu mati einungis ein hlið á Grænlandi og lífinu þar. Ég hafði ekki hugsað mér að blanda mér í ummræðuna að fyrra bragði heima á Íslandi. en sé nú að það birtast blogggreinar og annað í fjölmiðlum um ástandið á Grænlandi. Þar sem ég er tengdur Grænlandi, bý þar með minni grænlensku fjölskyldu og hef gert með hléum frá því 1971 þá er það kannski vel við hæfi að ég noti tækifærið og segji frá minni hlið á málunum. Daglegt líf í Grænlandi frá sjónarhóli eiginmanns, föður, afa, o.s.frv. Grænland er mitt heimaland. Og mér þykir vænt um Grænland, og fólkið sem hefur tekið mér vel. Ég mun því reyna að fremsta megni að blogga um á minni blogsíðu á mbl gujo.blog.is Það eru margir sem vilja segja frá dökku hliðunum á lífinu hér. Svoleiðis hefur það verið í gegnum tíðina. Kannski mótvægi, um gleði og góða hluti eigi rétt á sér í þessu samhengi

Með bestu kveðju

Guðmundur Þorsteinsson Nuuk, Grænlandi

[Sigurjón, 2.11.2007 kl. 10:23]

Mjög fínar myndir hjá þér.  Það er slæmt hve Grænlendingar fóru illa út úr því að hitta hvíta manninn, eins og reyndar frumbyggjar fleiri svæða...

[Kjartan Pétur Sigurðsson, 2.11.2007 kl. 10:38]

Ég var frekar að reyna að velja myndir í upphafi sem myndu undirstrika hinar félagslegu aðstæður og því byrjar myndaserían frekar dökk. Það var líka gert til að fá fólk til að hugsa til þess að á þessu svæðum er sjálfsmorðstíðni með því mesta sem gerist í heiminum. Hvers vegna?

Stundum talar myndmálið sterku máli og er það sú stefna sem að ég hef reynt að halda mig við í þessu bloggi mínu. Enda segja myndir oft meira en 1000 orð og því meira upp á lesandann að mynda sína eigin skoðun.

Grænland er æðislegur staður. Ég get alveg sagt það aftur... "Grænland er æðislegur staður" til að ferðast til og ég hef líka verið í viku ferðalagi á vesturströndinni m.a. við veiðar. Ég á ekki síðri myndir þaðan en það er allt á filmu og ekki unnist tími til að skanna þær inn og setja á netið. Þetta myndabrölt mitt hefur ALLT verið unnið á eigin kostnað og aldrei fengist styrkir, hvorki frá ríki né sveitafélögum til að halda öllu þessum myndavef gangandi. Er þá ekki í lagi að misnota aðeins miðil þeirra sem gefa sig út fyrir að standa við bakið á þeim sem stunda "sjálfstæða" baráttu sér og sínum til framfæris.

Ég veit vel af fínu hóteli þarna í Kulusuk og þar er topp aðstaða og það má m.a. sjá myndir af hótelinu ef allar myndirnar úr ferðinni eru skoðaðar. Hópurin var annars með hús í láni frá íslenskum hjónum sem eru búinn að stunda mannfræðirannsóknir á þessu svæði í nokkur ár og vita þau betur en margur um þær aðstæður sem þarna ríkja.

Ég vona að ég sé búinn að laga þessar leiðu villur í textanum og svo er leiðsögumaður ekki skrifað sem leðsögunmaður :)

En það er mikil vinna að halda úti svona bloggi ef það á að vera vel gert þá er fínt að fá svona athugasemdir og mun ég þá reyna að laga það sem miður fer.

Takk fyrir...

[Árni Valur (IP-tala skráð) 2.11.2007 kl. 11:41]

ahh skaut sjálfan mig í löpppina þarna....  :)    Mér þykir bara mjög vænt um þessa þjóð og menningu sem er þarna, þótt auðvitað sé hellingur sem meigi laga! Ég hef verið að ferðast til Grænlands í rúm 13 ár og fjölskilda mín á hús á Kap Tobin sem er lítið þorp 7 km sunnan við Ittoqqortoormiit (Scoresbysund). Þangað fer ég á hverju ári með túrista og líka bara til að hitta vini mína.   Grænland er alveg komið undir húðina mína og þangað mun ég fara alla mína ævi !   Myndirnar þínar eru mjög góðar !          Á þessari slóð getur séð myndir sem ég hef tekið þaðan :  http://flickr.com/photos/8721467@N02/   Ánægður með alla þessa umræðu, sést að okkur Íslendíngum er ekki alveg sama um nágrannann.

[Baldvin Kristjánsson, 2.11.2007 kl. 11:51]

Sæll

ég sé að ekki vilja allir draga upp þá hlið sem heldur þessu landi í fjötrum.

Staðreyndirnar eru hinsvegar verri og viðameiri en komu fram í þessari mynd.

"Heimastjórnarhetjurnar" stýra enn landinu, eftir 30 ár - hafa unnið allar kosningar síðan.

Sem er eðlilegt, þeir fá 3200.000.000 DKK ávísun í pósti á hverju ári sem þeir svo nota til að niðurgreiða ónýtt kerfi.

Flestir sem kjósa þann flokk búa í þorpum þar sem veiðimennska er aðalatvinnuvegurinn.

Helsta afurð veiðimanna er selskinn, sem er 100% niðurgreitt, þ.e. ríkið kaupir og gefur sútunarvinnslunni hér í bænum mínum (konan mín vinnur þar).

25% þjóðarinnar er með 78.000 danskar í árslaun - að meðaltali!

Skattleysismörk eru 48.000, borgar 45% skatt af restinni.

Veiðimenn eru flestir í þessum hóp.

0nnur 25% þjóðarinnar eru með 800.000 danskar í meðallaun, þar á meðal eru flestir embættismenn í topp stöðum, enda vinna 44% þjóðarinnar í "Government Administration."

Veiðimenn eru flestir óskólagengnir - eða í mesta lagi með barnaskóla.

Heldur þú að embættismennirnir vilji breytingar? Heldur þú að veiðimenn viti að hægt sé að hafa hlutina öðruvísi?

hér eru 11 x fleiri í fangelsi en á Íslandi.

hér eru 44 í háskóla..! 44 stk, ekki hundruð... (m.v. höfðatölu væru 650 í háskóla ef sambærilegt við Ísland).

það er margt að vinna og best að stinga ekki hausnum í sandinn.

öllum íslenskum tækifærum er fagnað hér á landi.

með kveðju frá Suður Grænlandi,

Baldvin Kristjánsson

[Kjartan Pétur Sigurðsson, 2.11.2007 kl. 12:27]

Ubs!

Þetta eru rosalegar tölur! Ég man þegar ég var við námi í Danmörku 1986, þá var einn grænlendingur með verkfræðimenntun í námuvinnslu. Mikið af unga fólkinu fer til Danmerkur í nám og endar þar oft í erfiðum aðstæðum.

[Katla Skúladóttir (IP-tala skráð) 2.11.2007 kl. 13:10]

Mjög flottar myndir!