Á íslandi er auðvelt að útbúa góða skíðaaðstöðu ef vilji er fyrir hendi og það á ekki að þurfa að fara hinu megin á hnöttinn til að stunda slíkt!

Það hafa margir haft samband við mig út af hugmyndum sem að ég birti á bloggi mínu hér fyrir skömmu:

http://photo.blog.is/blog/photo/entry/263922/

http://photo.blog.is/blog/photo/entry/268551/

http://photo.blog.is/blog/photo/entry/267781/

http://photo.blog.is/blog/photo/entry/262950/

Nýjar byltingakenndar hugmyndir - Breytum vinsælustu ferðamannaleið landsins "The Golden Circle" í "The Golden Circle Delux"!

Leiðin milli jökla. Þórisjökull - Geitlandsjökull. Ný "The Golden Circle Delux" leið. Aðeins lenging um 30 km miða við núverandi leið.

Loftmynd af Þórisjökli og Geitlandsjökli (klikkið á mynd til að sjá fleiri myndir)

Á næstu mynd má sjá nánar hugmyndir af nýrri og mikið endurbætta leið fyrir ferðamenn frá Reykjavík. En um "Gullna Hringinn" fara um 400 þúsund ferðamenn á ári!

Kort af nýrri leið þar sem farið er á milli Þórisjökuls og Geitlandsjökuls (klikkið á mynd til að sjá fleiri myndir)

Á Íslandi eru til margir leyndir og fallegir staðir sem aðeins fáir vita um.

Einn er sá staður sem mér er meira hugleikinn þessa daganna. En það er skarðið á milli Þórisjökuls og Geitlandsjökuls sem er fyrir suðvestan Langjökul.

Ég hef mikið velt fyrir mér hvernig hægt er að auka fjölbreytni í ferðaþjónustu. Finna þarf svæði sem hefur gott aðgengi og jafnframt með góða nýtingarmöguleika.

Þetta svæði býður upp á marga ótrúlega spennandi kosti ef vel er skoðað.

Spurning um að koma fyrir fjallaskála eða stóru háfjallahóteli uppi við suður jaðar Geitlandsjökuls í svipuðum stíl og gert er uppi í Jöklaseli í Vatnajökli. Bara allt mun stærra.

Þar væri hægt að þróa ýmsar skemmtilegar hugmyndir.

Eins og nýtt framtíðar heilsársskíðasvæði fyrir íslendinga og jafnvel búa til skíða- og háfjallaparadís.

Hugmyndin gengur út á eftirfarandi og mætti kalla "The Golden Circle Delux" leið

1) Húsi ásamt aðstöðu yrði komið fyrir uppi í ca. 1140 metra hæð rétt austan við Presthnjúk í jaðri Geitlandsjökuls.

2) Síðan yrði ÖLL skíðaaðstaða fyrir stór Reykjavíkursvæðið flutt á þetta nýja svæði. Eða með öðrum orðum að leggja niður Bláfjalla- og Skálafellssvæðið sem skíðasvæði! En það verður að viðurkennast að bæði þessi svæði hafa nýst frekar illa síðustu 3-4 árin og eru á kolröngum stað. Nú þegar er gríðarlega háum fjárhæðum varið árlega í uppbyggingu á þessum tveimur svæðum.

3) Lögð yrði ný leið eða hringleið sem færi frá Kaldadal yfir á línuveginn rétt við Hlöðufell og hún gæti svo haldið áfram niður á Gullfoss og væri þá komin nýr og endurbættur Gull hringur.

Töluvert óhagræði er í núverandi Gullna hring ef þarf að fara á jökul eða sleða en þá bætast við 2 x 35 km ef menn ætla upp í Skálpa á vélsleða og sú leið er oft gríðarlega erfið og ópraktísk inn að jökulsporðinum. Venjulega er þessi leið um 310 km þegar farin er Gull hringurinn líka!

Núverandi Gullhringur er um 240 km sem tekur ca. 3 kl.st. í keyrslu plús tími sem fer í stopp. Eins og sjá má á myndum, þá myndi bætast fullt af nýjum áhugaverðum svæðum fyrir ferðamanninn til að skoða. Þar mætti nefna stórfenglegt hálendi og flotta jöklasýn. Keyrt yrði með jökuljaðrinum og flottum fjöllum, vötnum, sandauðnum og fl. og væri jafnvel hægt að taka stóran og flottan fjörð í sömu leið ef lagður yrði vegaspotti niður frá Kaldadal niður í Hvalfjörð.

Ef farin yrði þessi nýja leið, þá er Þórisdalsleiðin um 18 km + 30 km niður að Gullfossi + til Rvk 124 km en við bætis svo leiðin um Mosó upp Kaldadal um 88 km eða samtals 270 km leið sem yrði þá hinn nýi Gullni-delux-hringur eða +30 km lengri leið en eldri hringleið og jafnframt með möguleika á mun fjölbreyttari dagskrá fyrir ferðamenn. Sparnaðurinn fyrir þá sem vildu komast á jökul yrði 310 - 270 km = 40 km miða við að fara upp í Skálpa sem er mikið fram og til baka keyrsla (70 km).

Að auki myndi sama aðstaða nýtast hvort sem verið væri að fara í Borgarfjörðinn um Kaldadal eða inn á Gullfosssvæðið og fullt af búnaði og aðstöðu myndi samnýtast margfalt betur - Allt árið :)

Eins og staðan er í dag þá er verið að aka til skiptis upp í Skálpa eða Jaka eftir því hvernig jökulinn hagar sér og eru bæði þessi svæði orðin mjög erfið í lok sumars.

Ef skoðað eru kort af Geitlandsjökli, þá má sjá 10-15 mög flottar og langar skíðabrekkur nánast allan hringinn ofan af 1300 metra háum jöklinum og þar er snjór sem er ekki að fara neitt á næstunni.

Þetta þýðir að það er hægt að renna sér niður úr ca. 1300 metra hæð niður 6-700 metra hæð sem gefur hæðamismun upp á 6-700 metra og brekkur sem eru allt að 10 km langar til að renna sér niður - ALLT ÁRIÐ!

Í Skálafelli er verið að renna sér úr 600 metrum niður í 400 metra sem er ca. 200 metra hæðamunur og í Bláfjöllum er verið að renna sér úr 610 metrum niður í 450 metra sem er ca. 160 metrar hæðamunur! Nú er spurning hvort að hægt sé að láta "Ís"-land ná að standa einu sinni undir nafni og verða loksins alvöru skíðaland sem yrði sambærilegt því sem best þekkist í útlöndum?

Vegalengd frá Reykjavík í Bláfjöll er ca. 35 km og í Skálafell ca. 33 km en á nýja svæðið yrði sú vegalengd um 99 km. Á móti kemur að svæðið er hægt að nýta nánast allt árið.

Leiðin upp Kaldadal er þegar orðin að hluta til mjög fínn heilsársvegur og þarf því ekki að leggjast í miklar vegaframkvæmdir eins og staðan er í dag.

Í fyrsta áfanga þyrfti að leggja nýjan upphækkaðan veg inn að Presthnjúkum sem er um 11 km og klára svo Kaldadalsleið upp að þeim afleggjara sem er um 23 km. En mig grunar að sá kafli sé nú þegar komið á áætlun vegamála.

Hér er kort af svæðinu stækkað nánar

Kort af nýrri leið þar sem farið er á milli Þórisjökuls og Geitlandsjökuls (klikkið á mynd til að sjá fleiri myndir)

Og hér er svo nákvæmt kort f svæðinu sem umræddar hugmyndir ganga út á

Kort af nýrri leið þar sem farið er á milli Þórisjökuls og Geitlandsjökuls (klikkið á mynd til að sjá fleiri myndir)

Hér koma svo myndir sem sýna þversnið af mögulegum skíðabrekkum á svæðinu. En þar sem möguleikar eru svo margir, þá sýni ég aðeins 10 fyrstu skíðabrekkurnar

Þversnið af skíðabrekku-1 (klikkið á mynd til að sjá fleiri myndir)



Kjartan
WWW.PHOTO.IS

Íslendingarnir skíða vel í Ástralíu

Athugasemdir

[Jón B (IP-tala skráð) 24.8.2007 kl. 09:31]

Sæll Kjartan,

ég var að hugsa um hvar þessar hugmyndir kæmu inní æfingasvæði fyrir afreksfólk á skíðum allt árið.  Ég sé ekki alveg hvernig þú ætlar að koma fyrir skíðalyftum á jöklana sem eru á sífelldri ferð.  Þetta væri jú kannski hugmynd um að grisja okkar litla hóp af góðu skíðafólki og missa þau ofan í sprungur.  Einnig hef ég ekki séð neinar hugmyndir um fjármögnun eða rekstur á því sem þarf til að hafa í gangi gott heilsársskíðasvæði fyrir skíðaáhugafólk.  Ég held þú sért meira að tala um jeppa, snjósleða og áhugafólk á skíðum sem að geta látið sér duga að hossast í jeppum uppá jökul og láta sér nægja eina bunu á skíðum niður jökulinn.  Allavega er ég ekki sannfærður um annars falleg gröf.  Ætli það sé ekki bara ódýrara að senda krakkana til Ástralíu til æfinga á sumrin og láta frekar þá peninga sem annars myndu kosta að útbúa svona svæði renna til þessara krakka og styðja þá þannig í því sem þau eru góði í og gera þeim kleift að vera betri.  Við bara erum ekki svo mörg hér á Íslandi, þú verður bara að átta þig á því.

Kv.

Jón B

[Ásdís Sigurðardóttir, 24.8.2007 kl. 10:01]

Mér finnast þetta skemmtilegar hugmyndir, ekkert verður til af engu, hugmynd til alls fyrst.  Kær kveðja

[Herbert Guðmundsson, 24.8.2007 kl. 22:07]

Þetta eru áhugaverðar pælingar, Kjartan Pétur, og fullkomlega þess verðar að hljóta athygli, umræðu og mat. Sams konar eða hliðstæðir möguleikar kynnu að vera á Vindheimajökli ofan Hlíðarfjalls á Akureyri. Þar er enn styttra frá byggð og ýmsum hugmyndum hefur verið velt upp um einteinungsferju þangað og/eða kláfi upp yfir brún Hlíðarfjalls með útsýnisveitingastað þar ... o.s.frv. Verðug spekúlasjón líka.

[Kjartan Pétur Sigurðsson, 25.8.2007 kl. 01:19]

Það er vel þekkt fyrirbæri að nota jökla sem skíðasvæði og eins og hefur komið fram áður hér á mínu bloggi um þessi mál þá benti einn á að "Norðmenn reka 3 sumarskíðasvæði og eru samt með miklu minni jökla en hér á landi. Þessi svæði eru á eða við þeirra þjóðlendur þ.e. við Harðangursvíðernið, Jötunheima og Jostedalsbreiðunni"

Svona skíðasvæði eru flest öll rekin af sjálfstæðum aðilum í Ameríku. Sem dæmi, þá virðast þessir aðilar kunna vel til verka þegar svona svæði eru sett upp og skilst mér að eitt svæðið sem að þeir eru með í rekstri sé að hluta til jökull.

http://vail.snow.com/winter/

og hér má sjá kort af skíðaleiðum

http://vail.snow.com/VailAssets/files/winter_content/Vail_winter_maps_small.pdf

Bláa Lónið er dæmi um hvernig standa á vel að hlutunum. Því er ekki hægt að gera það sama með skíðasvæði? Auðvelt er að beina hluta af þeim ferðamönnum um þetta svæði með breyttu skipulagi og styrkja rekstur á slíku svæði. Svo er það ekki spurning að íslendingar myndu sækja svona stað ef vel væri staðið að verki og mikill gjaldeyrir sparast sem annars færi í dýrar utanlandsferðir.

Ég er búinn að ferðast á jöklum í mörg ár og það er ekki eins og að allir jöklar séu eitt sprungusvæði. Ef kortin eru skoðuð betur, þá má sjá fjöll og hryggi sem standa víða upp úr á jöklum þar sem hægt er að koma fyrir húsum, aðstöðu og lyftum. Ég hef líka fengið það frá fyrstu hendi að fólk hafi verið að renna sér á þessum svæðum með góðum árangri fyrir mörgum árum síðan.

En auðvita má yfirfæra þessar hugmyndir á mörg svæði hér heima eins og fyrir norðan, en vandamálið er að fá nógu mikið flæði af fólki til að svona staður standi undir sér og því kom upp þessi pæling að tengja þetta svæði Gullna hringnum.

Það er auðvita hægt að verða fyrir slysum allstaðar og það eru þúsundi manna á ferð um hálendi ísland allt árið um kring án þess að mikið sé að koma upp af vandamálum. En staðreyndin er sú að flest slys gerast í heimahúsum. Það eru ákveðin svæði á jöklum sem ber að varast og þeir sem eru að fara með ferðamenn á jökla þekkja þau svæði vel og kunna að umgangast þau.

Þó talað sé um að Ok sé jökull, þá er nú ekki mikið orðið eftir af honum. mætti segja að þar sé frekar um fjall að ræða!