Skjálfti upp á 3.5 á Richter á Tjörnesbeltinu

Það virðist vera mikið um umbrot í gangi á jörðinni þessa dagana og er þá sama hvort er litið til fjármálamarkaðarins eða jarðfræðinnar.

Hér má svo sjá staðsetninguna á upptökum skjálftans út af Tjörnesbeltinu sem að ég var búinn að reka augun í í gær?

Ef farið er inn á vef Veðurstofunnar og skoðuð jarðskjálftavirkni á svæðinu, þá má m.a. sjá virkni á Mývatns- og Tjörneskortunum eins og þessar myndir sýna

Jarðskjálftakort Veðurstofunnar (smellið á mynd til að sjá fleiri myndir)

En eins og sjá má þá er mikil virkni á fleiri svæðum og hér má sjá jarðskjálftaóróan við Upptyppinga.

Jarðskjálftakort Veðurstofunnar (smellið á mynd til að sjá fleiri myndir)

Líklegt er að það sé kvika að þrýsta sér upp á yfirborðið á þessu svæði. En ekki er annað að sjá en að virknin síðustu kl.st. er orðin mjög mikil.

Ef það kæmi stórgos á þessu svæði, þá gæti myndast stór dyngja í anda Trölladyngju eða Skjaldbreiður á mjög löngum tíma. En líklegt yrði um að ræða gos í anda Kröflu eða Lakagíga eða einskonar sprungugos.

Kort af svæði þar sem virknin er mest í kringum Upptyppinga

Kort af svæði við Öskju, Herðubreið (smellið á mynd til að sjá fleiri myndir)

En mér skilst að næstu mögulegu gos geti orðið á Íslandi í Bárðarbungu, Grímsvötnum, Kötlu, Heklu, við Hágöngur, Öskju, Kverkfjöll og svo við Upptyppinga. Þetta eru 8 möguleikar og þar af er Hekla og Katla komnar í startholurnar.

Því er allt útlit fyrir að það geti farið að gerast eitthvað mjög fljótlega - enda úr nógu að moða.

Kjartan
WWW.PHOTO.IS

Jarðskjálfti við Grímsey

Athugasemdir

[Kjartan Pétur Sigurðsson, 17.8.2007 kl. 15:26]

Sæll Einar.

Þú segir mér fréttir ef rétt reynist - En þessar vangaveltur eru áhugaverðar. Við vitum að dýrin finna oft á sér þegar eitthvað mikið er að fara að gerast í náttúrunni og líklega á það sama við hjá mannskepnuna þó svo að hún viti það ekki sjálf alltaf. Spurning hvort að óöryggið á fjármálamörkuðum megi rekja til þeirra jarðhræringa sem nú eru í gangi.

Annars er orðið langt síðan við fengum alvöru stórgos. En síðustu árþúsundin hafa þau verið einhver þau stærstu í heiminum hér á Íslandi. Þessi stórgos hafa oftar en ekki haft gríðarleg áhrif á búsetu og líf fólks hér á landi og stundum langt út fyrir landssteinanna eins og þú réttilega bendir á.

Gosið í Lakagígum er talið stærsta gos síðustu 1000 árin og áhrifin voru gríðarleg. Kólnunin á norður hveli jarðar var svo mikil í kjölfarið að það myndaðist ís á miðju sumri bæði á Signu (París) og Thames (London) og uppskerubrestur varð í Frakklandi sem fróðir menn telja að hafi svo komið frönsku byltingunni af stað.

Ég get þakkað veðurstofunni það að ég hef getað fylgjast spenntur með þessum jarðhræringum síðustu vikurnar. Enda tæki og tól orðin ólíkt betri í dag en áður til að greina hvort hann þarna niðri er að reyna að senda okkur eitthvað upp á yfirborðið.

Þessa 20-30 ára kenningu þína varðandi áframhaldandi umbrot í framhaldi af Kröfluævintýrinu á sínum tíma þekki ég ekki svo gjörla en hún hljómar spennandi. En eitt ber að hafa í huga að sá tími sem mannsaldur tekur er smámunir einir í samanburði við þann tíma sem jarðfræðin miðast við.

Svo er að sjá hvernig Hálslóni og svæðinu þar í kring muni reiða af í framtíðinni. Nú er reynslan af öllu þessu virkjanabrölti búin að vera nokkuð góð hvað það snertir og við erum með 7-8 virkjanir í næsta nágreni við Heklu sem er ein virkasta eldstöð landsins.

En það er víst bara tíminn sem mun leiða þetta allt saman í ljós.