Hér er aðeins minni lúxus. Eitthvað sem hentað gæti fleirrum. Ný hugmynd!

Hvað gerum við Íslendingar þegar það fara að koma 1.000.000 plús ferðamenn til landsins? Hvernig væri að nota íslenskt hugvit og þekkingu til að sérsmíða okkar eigið samgöngukerfi?

Síðustu vikur er ég búinn að velta fyrir mér og útfæra hugmynd sem gæti komið til með að leysa mörg vandamál okkar íslendinga í ferða- og samgöngumálum.

Samgöngukerfi á brautum gæti verið sniðug lausn fyrir þéttbýlasta svæðið sem er á suðvesturhorn landsins.

Hugmyndin gengur út á að byrja á því að tengja Suðurnesin við stórreykjavíkursvæðið með því að leggja sérsmíðaða braut frá Keflavíkurflugvelli til Reykjavíkur. Næsta skref er að tengja byggðirnar á Suðurlandinu ásamt vinsælustu ferðamannastöðunum saman í eitt kerfi.

Samgöngukerfið byggist á brautum ekki ósvipað lestum nema eftir brautunum aka vagnar og ýmis smáfarartæki. Faratækin myndu virka eins og verið væri að taka lyftu í fjölbýlishúsi. Þú stígur um borð og þrýstir á hnapp sem tilheyrir þeim stað sem þú ætlar að fara á. Þetta er í raun faratækis án ökumanns sem er eins og lyfta, nema lyftan er á hjólum.

Farartækið verður að vera létt og geta ferðast hratt yfir og ekki væri verra ef notast væri við innlenda umhverfisvæna orkugjafa.

Mikið er horft til Íslands þessa daganna í samgöngumálum. En hvað erum við annars að gera í þeim málum? Viljum við láta taka mark á okkur og sýna fram á það að við erum leiðandi þjóð á því sviði? Væri ekki ráð að koma með snilldar lausn sem allir myndu virkilega taka eftir?

Vissulega virkar þessi hugmynd stór í sniðum á marga við fyrstu sýn. Því ekki að nota íslenskt hugvit og þekkingu og samnýta sérþekkingu sem liggur víða í þjóðfélaginu til að hanna og smíða okkar eigið samgöngukerfi?

Við vitum að það er gríðarleg aukning í samgöngum á suðvesturhorni landsins með tilheyrandi vandamálum. Á sama tíma fjölgar ferðamönnum. Borgin er að springa undan umferðarþunga. Mikil gagnrýni er komin á Reykjavíkurflugvöll og það vantar tilfinnanlega byggingarsvæði fyrir Reykjavík.

Hvernig væri að koma með varanlega framtíðarlausn þar sem ekki er bara hugsað til morgundagsins?

Það voru margir svartsýnir þegar jarðgöngin undir Hvalfjörð voru byggð. Núna er jafnvel talað um að byggja önnur slík!

Fyrir nokkrum árum, þá stóðu stjórnvöld í Kuala Lumpa (Malaysia) í svipuðum vanda og voru að spá í að kaupa tilbúið kerfi frá Japan. Kerfið reyndist allt of dýrt svo að yfirvöld settust niður og óskuðu eftir því að innlendir aðilar kæmu með tillögu að nýju kerfi til að leysa samgöngumálin í borginni. Hönnuðir voru komnir með frumgerð (prototype) 3 mánuðum seinna og síðan hefur sú framkvæmd verið mikill happafengur fyrir borgina. En núna aka um borgina svo kallaðir "Monorail" vagnar á einu spori. Að auki eru þeir að flytja út þessa þekkingu til annarra landa í stórum stíl.

Á eftirfarandi mynd og korti má sjá hugmyndir af brautarkerfi fyrir suðvesturhorn landsins.

Brautarkerfi, lest eða monorail kerfi fyrir Reykjanes, Gullna hringinn og Suðurland (smellið á mynd til að sjá fleiri myndir)

Eins og sjá má á kortinu, þá er verið að tala um tvær megin leiðir. Sú rauða tengir byggðarkjarnana á Reykjanesi saman og sú seinni suðurlandið og áhugaverðustu ferðamannastaðina saman.

Það sem er sameiginlegt öllum þessum svæðum er að um þau fer mikill fjöldi fólks daglega og ætti það að styrka rekstur á slíku kerfi til muna.

Ef rauða leiðin um Reykjanesið er skoðuð nánar, þá má sjá að leiðin er óhefðbundin þar sem lögð er áhersla á fáfarna leið með stórbrotna náttúru í stað þess að fara hefðbundna leið þar sem þjóðvegurinn liggur. Um Reykjanesbrautina aka hátt í 10.000 bílar á sólahring sem getur verið um 10.000.000 farþegar á ári. Stór hluti af þessu fólki eru ferðamenn sem eru að koma til landsins eða fara frá landinu. Ekki er annað að sjá en að hlutfall ferðamanna eigi eftir að vaxa verulega á næstu árum. Því ætti flott aðkoma að landinu þar sem lögð er áhersla á stórbrotna náttúru að vera stórt atriði. Um Bláa Lónið fer stór hluti ferðamanna, einnig er að koma inn nýtt þorp á Keflavíkurflugvelli þar sem býr m.a. skólafólk sem þarf að hafa aðgang að ódýrum ferðamáta í skólana á Reykjavíkursvæðinu. Með tilkomu svona kerfis, þá stækkar í raun höfuðborgarsvæðið til muna. Einni eru háværar kröfur um að leggja niður Reykjavíkurflugvöll og flytja aðstöðuna til Keflavíkur og myndast þá verðmætt byggingarland í hjarta Reykjavíkur. Á ári ferðast um 400 þúsund farþegar með innanlandsflugi til og frá Reykjavíkurflugvelli. Til að byrja með myndu vagnarnir stoppa í öllum helstu byggðarkjörnunum og við Smáralind, Kringluna og miðbæ Reykjavíkur.

Ef litið er á Grænu leiðina, þá má sjá að hún er endurbættur, Gull hringur, sem er jafnframt vinsælasta leiðin sem við höfum upp á að bjóða ferðamönnum í dag. En á ári fara um 500.000 ferðamenn þessa leið og ef vöxtur eykst eins og miðað er við á næstu árum, þá verður ekki langt þar til að þeir verða um 1.000.000 á ári! Ferðaþjónustan er sú atvinnugrein sem vex hvað hraðast og er að afla um 12 prósent af gjaldeyristekjum þjóðarinnar.

Væri þá ekki ráð til að vernda svæði eins og Þingvöll betur að lágmarka alla umferð ökutækja um svæðið nema með svona hljóðlausum og umhverfisvænum vögnum. Ferðamenn tækju ferðavagninn til Þingvallar með því a velja viðkomandi hnapp og réðu svo sínum tíma sjálfir með því a ganga um svæðið og þegar viðkomandi telur sig búinn að fá nóg, þá er stigið upp í næsta vagn og haldið áfram á næsta áfangastað. Með þessu myndi fást mun meiri dreifing og álagstoppar lækka og ferðamaðurinn fær ekki á tilfinninguna lengur að það séu 20 rútur á sama tíma eins og oft vill gerast við Gullfoss og Geysi.

Samkvæmt könnunum, þá hafa erlendir gestir einkum áhuga á náttúrutengdri afþreyingu og býður Græna leiðin nánast upp á alla þá möguleika í einni hringferð.

Ástæðan fyrir því að græna leiðin er lögð upp að Langjökli er að við eigum að leggja stóraukna áherslu á að fólk fái að komast á jökla, á skíði, ísklifur, skíðagöngu, vélsleða jeppaferðir í snjó og allt við topp aðstæður. En eins og hefur áður komið fram hjá mér, þá á að leggja niður núverandi skíðasvæði og flytja þangað upp eftir.

http://photo.blog.is/blog/photo/entry/293926/
http://photo.blog.is/blog/photo/entry/263922/
http://photo.blog.is/blog/photo/entry/268551/
http://photo.blog.is/blog/photo/entry/267781/
http://photo.blog.is/blog/photo/entry/262950/

Nýjar byltingakenndar hugmyndir - Breytum vinsælustu ferðamannaleið landsins "The Golden Circle" í "The Golden Circle Delux"!

Leiðin milli jökla. Þórisjökull - Geitlandsjökull. Ný "The Golden Circle Delux" leið. Aðeins lenging um 30 km miða við núverandi leið.

Loftmynd af Þórisjökli og Geitlandsjökli (klikkið á mynd til að sjá fleiri myndir)

En eins og áður segir, þá gengur hugmyndin út á að láta vagninn aka eftir braut sem gæti verið svipuð og gömlu hitaveitustokkarnir. Svona stokkur gæti haft margþættan tilgang og þá sem lagnaleið á milli svæða fyrir raflagnir, fjarskiptalagnir, heitt og kalt vatn m.m.

Mynd sýnir stokk sem hefur fjölþættan tilgang auk þess að vera braut fyrir farartæki (klikkið á mynd til að sjá fleiri myndir)



Mynd sýnir rafdrifið ökumannslaust farartæki sem ekið gæti eftir svona brautum. (klikkið á mynd til að sjá fleiri myndir)

Nú skora ég á borgaryfirvöld, sveitastjórnir og stjórnvöld þessa lands að hugsa að alvöru um þessi mál.

Undirritaður býður sig fram til að safna saman hópi af hönnuðum, hugvitsmönnum og fyrirtækjum til að setjast niður og kortleggja möguleika í svona verkefni.

Kjartan
WWW.PHOTO.IS

Dýrasti lúxusbíllinn á 200 milljónir

Athugasemdir

[Jóhannes Smári Þórarinsson (IP-tala skráð) 17.10.2007 kl. 08:11]

Góð hugmynd sem svipar til einnar sem ég hef gengið með lengi. Ég vil gjarnan vera með í þessari hugmyndavinnu og koma á einhverjum þrýstihópi um varanlegar og umhverfisvænar samgöngulausnir.

[Kjartan Pétur Sigurðsson, 17.10.2007 kl. 08:17]

Ekki málið. Um að gera að fá umræðu um málið. Eins og sjá má, þá er ég búinn að vinna töluvert í þessari hugmynd og það sem hér er reifað er aðeins toppurinn á ísjakanum.

GSM hjá mér er 892-3339

Kjartan

[Baldvin Jónsson, 17.10.2007 kl. 08:44]

Ég sendi tengil hingað inn til fulltrúa í borgarstjórn.  Væri gaman að sjá hvort að það skili viðbrögðum :)

[Sveinn Ingi Lýðsson, 17.10.2007 kl. 08:46]

Góðar pælingar hjá þér.  Ég var fyrir nokkrum árum í Malasíu og sá lestakerfið í Kuala Lumpur.  Tær snilld og ekkert annað.  Þegar þeir byggðu nýja flugvöllinn þá var hann 80 km frá borginni.  Undir torginu sem er við Petronas tvíburaturnana er neðarjarðar innritun í flugið, vegabréfaeftirlit og öryggisgæsla.  Þaðan stígur maður inn í lest (einteinung) sem þýtur í neðanjarðarstokk inn í flughöfnina á flugvellinum og þaðan er örstutt að fara á færiböndum að gate.

Ég sé fyrir mér innritun fyrir allt flug miðsvæðis á höfuðborgarsvæðinu, t.d. í Mjódd, og þaðan einteinung eða túbu til Keflavíkurflugvallar.   Í þessu liggur framtíðin, ekki að hver farþegi fari á sínum bíl eftir Reykjanesbrautinni. 

Frábært hjá þér.  Talaðu við Trausta Valsson skipulagsfræðing sem er hafsjór hugmynda um miðlæg samgöngukerfi.  Hann er prófessor hjá HÍ.

[Baldvin Jónsson, 17.10.2007 kl. 08:47]

Finnst þetta snilldar hugmynd og afar umhverfisvæn.  Minnkar verulega umferð þungra bíla um Gullna hringinn sérstaklega sem er afar vel.  Nóg er nú umferðin í dag, hvernig verður þetta þegar komnir eru um 1000.000 ferðamenn á ári?

Deluxe er síðan snilldar leið til að fara Gullhringinn í jeppa með viðkomu á Langjökli, er þó kannski líklegra til skemmri tíma litið að notast verði áfram við Haukadalsheiðina um sinn.

[Baldvin Jónsson, 17.10.2007 kl. 08:52]

Gleymdi því að ég ætlaði að setja inn með hér að ofan að við fyrstu sýn dettur manni strax í hug að svona apparat gæti gengið afar hægt þar sem að alltaf er fólk að stíga inn í vagn eða fara út úr vagni einhversstaðar í kerfinu, en það má að sjálfsögðu leysa með útskotum á stoppustöðum. Þar geta vagnar stoppað, einn eða fleiri í einu, án þess að trufla flæðið um aðallínuna.

[Anton Þór Harðarson, 17.10.2007 kl. 08:57]

Sæll Kjartan

Fín hugmynd, en á þessum hraða sem þú talar um 300-500 km/klst held ég að segullest myndi virka betur en lest á hjólum, bæði meiri þægindi og öryggi.  http://www.o-keating.com/hsr/maglev.htm

http://www.maglev.de/index.php

http://www.google.no/search?hl=no&q=maglev&meta=

[Kjartan Pétur Sigurðsson, 17.10.2007 kl. 09:20]

Takk fyrir góð viðbrögð. Ég prófaði í morgun að senda slóðina á einn borgarfulltrúa sem er fljótur og einn af fáum sem svara póstum sem að hann fær. Verður gaman að sjá hver viðbrögðin verða.

Ég er búinn að skoða töluvert lestakerfið í Kuala Lumpur í þessu sambandi og er það mjög vel lukkað. Það hefur nokkrar takmarkanir sem að ég tel að mín lausn leysi betur. Nú er spurning hvort að menn hafi þor til að takast á við svona verkefni hér á Íslandi?

Mig grunar að Trausti sé rétti maðurinn enda vann hann flotta kynningu fyrir Reykjavík á sínum tíma. Ég vildi þróa hugmyndina eins mikið og hægt væri svona á eigin nótum til að byrja með. Fókusinn í svona verkefni þarf að vera skýr og menn verða að vera fljótir að átta sig á því hver er rétta leiðin hverju sinni í svona stóru verkefni. Hér þarf líka að tala við reynslubolta sem hafa smíðað alla skapaða hluti með góðum árangri. Hér er búið að sérsmíða rútur í hálfa öld með góðum árangri og svo er fullt af fyrirtækjum að búa til tilbúnar steypueiningar. 15 metra þakbiti úr steypu sem ber 3.5 tonn kostar um 8.000 kr/m2 komin á staðinn. Það gerir ca. 35 milljónir að smíða tvöfalda svona braut á hvern kílómeter. Samsvarandi kostar að leggja venjulegan tvöfaldan veg um 60 miljónir á hvern kílómeter. Einnig er gríðarleg þekking til staðar í hugbúnaðar- og tæknifyrirtækjum og svo er orðið auðvelt að smíða og þróa hluti í dag með tilkomu CNC véla og 3D teikniforrita.

Ég var búinn að skoða mikið lausnirnar þar sem Maglev tækni er notuð. En þar flýtur lestin á segulsporum. Þar eru menn búnir að vera að berjast við mörg tæknileg vandamál og svo er kostnaðurinn gríðarlegur.

Mín lausn gefur möguleika á að aka farartækjum af ýmsum stærðum og gerðum inn á brautina. Það geta verið allt frá litlum 2ja manna upp í 40 mann sjálfvirk ökutæki. Þau gætu síðan hlaði sig upp á brautinni og ekið svo út af henni út á venjulegan veg.

Kjartan

[Baldvin Jónsson, 17.10.2007 kl. 10:07]

Alls kyns hugmyndir sem geta komið þarna inn í, s.s. einkaframkvæmd vs. opinberri.  Samstarf við ferðaþjónustuaðila með stopp á leiðum og jafnvel greiðslu frá þeim inn í verkefnið gegn því að þeir séu með.

Svona ískalt kapitalískt viðhorf "við stoppum hér ef þú ert með í pottinum".

Má lengi velta fram fleiri möguleikum.  Ég hygg persónulega að mun auðveldara væri að ljá verkefninu brautargengi með "einka" peningum en opinberum.  Það er engin vafi á því að verkefnið er afar arðbært.

Set hins vegar spurningarmerki við hugmyndina um að bílarnir geti síðan ekið út af brautinni.  Það kallar á afar flókna hönnun vagnanna, kallar á mun meiri viðhaldskostnað og kallar á vandamál því tengdu að ferðamaðurinn geti sjálfur stýrt einhverju í tækinu og t.d. ekki náð aftur á braut áður en hleðsla er búin. o.s.frv. o.s.frv.  Er að mínu mati í öllum tilfellum betra að tækið/vagninn sé algerlega sjálfvirkt/sjálfvirkur að neyðarhemlun undanskilinni.

[Birgir Grimsson (IP-tala skráð) 17.10.2007 kl. 10:22]

Sæll Kjartann

 Ég hef lengi verið með slíkar pælingar í hausnum og er farið að klæja í fingurnar að koma þessum pælingum í framkvæmd.

Mín lausn er framþróuð út frá Maglev lestinni og ýmsu öðru sem ég hef séð erlendis þ.m.t Metro í Dk og Smávögnum í Englandi.

Getur þú sent á mig póst á [e-mail] og þá get ég farið yfir þessar pælingar og kannski við ættum að safna liði. Ef það eru fleiri sem hafa áhuga, sendið mér endilega póst.

kveðja

Birgir G

[Kjartan Pétur Sigurðsson, 17.10.2007 kl. 11:14]

Einkaframkvæmd gæti verið lausnin. Spalarverkefnið gekk vonum framar og allir fengu sitt að lokum. Fjárfesta fullt af peningum og hinn almenni neytandi jarðgöng og flotta samgöngubót.

Þetta "kapítalískt viðhorf" sem að þú minnist á loðir því miður við margt í okkar þjóðfélagi en því miður þarf það stundum svo hægt sé að gera hlutina að alvöru.

Þetta með að setja ökutæki inn og út á brautina á mörgum stöðum er bara ein af mörgum pælingum sem að ég hef verið að velta fyrir mér og var í upphafi meira hugsuð sem þjónustulegs eðlis.

En hugmyndin er að hraða verkinu sem mest og nota nánast tilbúinn bíl sem væri með endurbættum hjólabúnaði á brautina. Sem dæmi, þá væri auðvelt að breyta 20 manna Sprinter Bens rútu sem mætti þá drífa með olíu, vetni, rafmagni eða einhverju álíka á meðan á prófunum stæði.

Metróinn er flottur í Danmörku og þar eru Danir búnir að koma upp kerfi sem virkar vel. Vél-, hugbúnaður og ýmsar sérlausnir eru þegar til á þessum markaði.

Ég gæti vel hugsað mér blandað kerfi þar sem minni hugmynd væri blandað saman við þessa tækni hér: http://www.taxi2000.com/

En Birgir, mig grunar að það séu margir búnir að vera að velta sér upp úr þessu máli í mörg ár hér heima. Íslendingar eru orðnir svo alþjóðlegir og koma víða við og sjá því vel hvað aðrar þjóðir eru a gera í þessum málum. Því er það með ólíkindum að við skulum ekki vera komin lengra í þessum málum. Erum nánast enn í torfkofanum hvað þetta snertir. Óhætt er að segja að það eru margir samstarfsfletir í þessu máli og margir aðlar sem gætu haft áhuga á að koma að þessari framkvæmd.

Það virðist vera mikill áhugi á að safna saman hópi af fólki með áhuga á þessum málaflokki. Spurning um að vera með opna umræðu á einhverjum stað á næstu dögum og gefa fólki smá tíma til að hlaða vopnin og spá nánar í þessi mál.

Kjartan